Muonekano wa Uwanja Mpya wa Mpira Jijini Arusha Wafikia Asilimia 42

Ujenzi wa uwanja mpya wa kisasa wa mpira wa miguu unaojengwa jijini Arusha umefikia hatua ya asilimia 42, hatua inayoashiria maendeleo chanya kuelekea maandalizi ya michuano ya Kombe la Mataifa ya Afrika (AFCON) 2027. Mradi huu mkubwa unatekelezwa katika kata ya Olmoti, ikiwa ni sehemu ya mkakati wa serikali wa kuboresha miundombinu ya michezo nchini Tanzania.

Kaimu Mkurugenzi wa Idara ya Maendeleo ya Michezo kutoka Wizara ya Habari, Utamaduni, Sanaa na Michezo, Ndg. Boniface Tamba, alitoa taarifa hiyo Mei 30, 2025 wakati wa ziara ya ukaguzi kwenye eneo la ujenzi. Akizungumza na waandishi wa habari, Tamba alieleza kuwa ameridhishwa na kasi ya ujenzi, huku akisisitiza kuwa matarajio ya kukamilisha mradi huo kwa wakati yapo palepale.

“Tunaendelea kushuhudia maendeleo mazuri ya ujenzi wa uwanja huu. Kwa sasa tupo kwenye asilimia 42 na tunatarajia kukamilika kabla ya muda uliopangwa ili kuruhusu maandalizi kamili ya mashindano ya AFCON 2027,” alisema Tamba.

Uwanja huu ni miongoni mwa viwanja vinavyotarajiwa kutumika wakati Tanzania ikiwa mwenyeji wa AFCON 2027, michuano inayotarajiwa kuvutia maelfu ya mashabiki kutoka ndani na nje ya Afrika. Serikali imeweka mkazo mkubwa katika kuhakikisha miundombinu yote muhimu inajengwa kwa viwango vya kimataifa ili kuleta taswira bora ya nchi kimataifa.

Kwa mujibu wa maelezo kutoka kwa wasimamizi wa mradi, uwanja huo utakuwa na uwezo wa kuchukua mashabiki wengi, utakuwa na vyumba vya kisasa vya kubadilishia, vyumba vya waandishi wa habari, sehemu za mazoezi, taa za kisasa na mfumo wa usalama wa hali ya juu.

Tanzania, kupitia ujenzi huu, inaonesha dhamira yake ya dhati katika kukuza michezo na kuvutia matukio makubwa ya kimataifa, jambo litakalosaidia kuongeza pato la taifa kupitia utalii wa michezo na biashara nyingine zinazohusiana na sekta hiyo.